Ergayga Gaarka ah ee Guddoomiyaha Guddiga Midowga Afrika u qaabilsan Soomaaliya ahna Madaxa Hawlgalka Midowga Afrika ee Taageerada iyo Xasilinta Soomaaliya (AUSSOM), Danjire El Hadji Ibrahima Diene, ayaa warbixin ku saabsan xaaladda Soomaaliya iyo hirgelinta waajibaadka AUSSOM siiyay Guddoomiyaha Guddiga Midowga Afrika, Mudane Mahmoud Ali Youssouf.
Warbixinta ayaa diiradda lagu saaray horumarka laga gaaray fulinta waajibaadka AUSSOM, xaaladda amniga ee dalka iyo dadaallada socda ee lagu taageerayo Dowladda Federaalka Soomaaliya. Guddoomiyaha Guddiga Midowga Afrika ayaa bogaadiyay doorka joogtada ah ee AUSSOM uu ka qaadanayo sugidda nabadda, amniga iyo xasilinta Soomaaliya. Waxa uu sidoo kale xusay muhiimadda ay leedahay wada-shaqeynta dhow ee u dhexeysa Hawlgalka AUSSOM, Dowladda Federaalka Soomaaliya iyo dalalka ciidamada ku biiriyay hawlgalka, si loo ilaaliyo shacabka, loo dardargeliyo dadaallada xasilinta, loona xoojiyo hay’adaha dowladda.
Sidoo kale, wuxuu carrabka ku adkeeyay muhiimadda ay leedahay in si tartiib-tartiib ah oo ku saleysan shuruudo cad loogu wareejiyo mas’uuliyadda amniga Ciidamada Amniga Soomaaliyeed, si loo xaqiijiyo in hay’adaha amniga qaranku si buuxda ula wareegaan sugidda amniga dalka.
Guddoomiye Mahmoud Ali Youssouf ayaa ammaanay geesinimada, xirfadda iyo naf-hurnimada ciidamada iyo shaqaalaha AUSSOM, isagoo dib u xaqiijiyay sida ay Midowga Afrika uga go’an tahay sii wadidda taageerada Soomaaliya si loo gaaro nabad waarta, xasillooni iyo isku-filnaansho dhanka amniga ah.
