Agaasimaha Tacliinta Sare ee Wasaaradda Waxbarashada, Hiddaha iyo Tacliinta Sare ee Dowladda Federaalka Soomaaliya, Mudane Maxamed Cabdullaahi Tawakal, ayaa booqasho shaqo ku yimid Jaamacadda Kismaayo.

Intii uu halkaas ku sugnaa, Agaasimaha waxaa si diirran u soo dhaweeyey maamulka iyo hoggaanka Jaamacadda Kismaayo, kuwaas oo uga warbixiyey horumarka guud ee jaamacadda, barnaamijyada waxbarasho ee socda, iyo dadaallada lagu horumarinayo tayada tacliinta sare.

Agaasimaha ayaa si weyn u bogaadiyey doorka Jaamacadda Kismaayo ee horumarinta waxbarashada iyo kobcinta aqoonta dalka, isagoo ku dhiirrigeliyey in la sii xoojiyo tayada waxbarashada, cilmi-baarista, iyo adeegga bulshada.

Sidoo kale, maamulka Jaamacadda Kismaayo ayaa Agaasimaha ku geeyey dalxiis iyo kormeer uu ku tagay deegaanka dalxiiseedka Goobweyn, oo ka mid ah meelaha quruxda dabiiciga ah ee gobolka, halkaas oo uu Agaasimuhu ku arkay bilicda deegaanka iyo muhiimadda uu u leeyahay horumarinta dalxiiska gudaha.

Ugu dambeyn, booqashadan isku dhafan ee waxbarasho iyo dalxiis ayaa lagu tilmaamay mid xoojinaysa iskaashiga Wasaaradda Waxbarashada iyo Jaamacadda Kismaayo, isla markaana muujinaysa muhiimadda isku xirka tacliinta, horumarka bulshada, iyo ka faa’iidaysiga kheyraadka dalxiiska ee dalka.