Laascaanood, 31 Luulyo 2026 – Madaxweynaha Dawladda Waqooyi Bari, Mudane Cabdiqaadir Axmed, ayaa wareegto rasmi ah ku magacaabay Agaasimaha Guud iyo Agaasime Ku-xigeenka Madaxtooyada, isaga oo sheegay in magacaabistan ay ku saleysan tahay aqoonta, kartida iyo waaya-aragnimada masuuliyiinta la magacaabay.
Sida lagu sheegay wareegtada Madaxweynaha, magacaabistan ayaa loo sameeyay si waafaqsan Qodobka 72-aad ee Dastuurka Dawladda Waqooyi Bari.
Masuuliyiinta la magacaabay ayaa kala ah:
- Mudane Maxamed Cali Haybe, oo loo magacaabay Agaasimaha Guud ee Madaxtooyada Dawladda Waqooyi Bari (DWBS).
- Mudane Cabdirisaaq Nuur Xaaji Ibraahim, oo loo magacaabay Agaasime Ku-xigeenka Madaxtooyada Dawladda Waqooyi Bari (DWBS).
Madaxweynaha ayaa u hambalyeeyay masuuliyiinta cusub, isaga oo u rajeeyay inay si hufan u gutaan waajibaadka culus ee loo igmaday, isla markaana Alle uga baryay inuu u fududeeyo masuuliyadda ay la wareegeen.
Magacaabistan ayaa qayb ka ah dadaallada lagu xoojinayo hannaanka maamulka iyo tayeynta shaqada hay’adaha Madaxtooyada Dawladda Waqooyi Bari.
