Garsoorihii hore ee Premier League, Mark Clattenburg, ayaa shaaca ka qaaday in xiddigii hore ee Chelsea, John Mikel Obi, uu isku dayay inuu feero, kaddib kulan muran badan dhaliyay oo dhex maray Chelsea iyo Manchester United bishii Oktoobar 2012.
Clattenburg oo hadda 50 jir ah, wuxuu sheegay in weerar af iyo gacan ah uu kala kulmay Mikel kaddib markii Chelsea ay ku eedeysay inuu si cunsuriyad ah ula dhaqmay xiddiga reer Nigeria intii uu socday kulan ka dhacay Stamford Bridge.
Chelsea waxay ku andacoodeen in Clattenburg uu ugu yeeray Mikel “monkey” (daanyeer) – eedeyn aad u culus oo si weyn u buuxisay warbaahinta waqtigaas. Hase yeeshee, Ururka Kubadda Cagta Ingiriiska (FA) ayaa baaritaan dheer kaddib si buuxda u shaaciyay in Clattenburg aanan lagu heyn wax caddeyn ah.
Si kastaba, FA waxay go’aamisay in John Mikel Obi uu si halis ah ugu hanjabay garsooraha, taasoo keentay in la saaro ganaax ciyaareed iyo ganaax lacageed oo gaaraya £60,000.
Clattenburg wuxuu sheegay in dhacdadaasi ahayd mid kamid ah kuwii ugu murugada badnaa ee soo mara xirfadiisa, isagoo carrabka ku adkeeyay in eedeeymaha noocaas ah aysan jirin meel ay kaga jiraan ciyaarta.
Dhacdadan ayaa mar kale soo shaac baxday xilli la xasuusanayo taariikhaha murugada leh ee dhex marta garsoorayaasha iyo ciyaartoyda heerka sare, gaar ahaan marka laga hadlayo cunsuriyadda iyo dhaqanka ciyaarta oo laga rabo in uu ahaado mid cadaalad iyo ixtiraam ku dhisan.
KALA SOCO WARARKEENNA DALBILE RADIO 98.0 Mhz KISMAAYO IYO NAWAAXIGEEDA .
